Flora Islandica

Crymogea, bókaútgáfan okkar Snæbjörns Arngrímssonar, gefur út nú í desember risabók sem er vart sambærileg við aðrar bækur á markaði. Maður reynir að stilla sig um að brúka of stór lýsingarorð, en þetta er einfaldlega ofurgripur. Flora Islandica er safn flóruteikninga Eggerts Péturssonar sem hann vann fyrir bókina Íslensk flóra með litmyndum sem kom út árið 1983. Eðlilega voru þær teikningar hafðar smáar enda handbók fyrir grasaáhugamenn eftir Ágúst H. Bjarnason. Alls teiknaði Eggert 271 mynd fyrir bókina, allar í A3 stærð, en svo furðulegt sem það nú er hafa þessar myndir vart sést í sinni upprunalegu dýrð, þangað til núna.

Hugmyndin varð til á yfirlitssýningu Eggerts á Kjarvalsstöðu í fyrra. Þar var bókin sýnd í glerkassa en það vakti athygli okkar að engin frummyndanna var sjáanleg, samt hlaut þessi bók og sú mikla vinna sem Eggert lagði í hana að hafa verið gríðarlega mikilvæg fyrir feril hans sem málara. Síðan kom í ljós að allar myndirnar voru til, ofan í geymslu hjá Eggerti.

Það hefur tekið tímann sinn að útbúa þessa bók, velja pappír og ganga frá öllum smáatriðum, en nú í vikunni eru fyrstu eintökin væntanleg. Aðeins eru gefin út 500 eintök, tölusett og árituð af Eggerti.

 Bókin liggur í öskju sem er handsmíðuð úr krossviði og klædd með svörtu efni og titillinn þrykktur í silfri framan á. Allt vegur þetta um 10 kíló.

Bókina má panta á [e-mail]